JAYA TV News Release

கோழி எருவில் இருந்து மின்சாரம் தயாரிக்கும் புதிய தொழில்நுட்பம் – திருச்செங்கோட்டை சேர்ந்த தொழில்முனைவோர் கண்டுபிடித்து சாதனை கோழி எருவில் இருந்து மின்சாரம் தயாரிக்கும் புதிய தொழில்நுட்பத்தை, நாமக்கல் மாவட்டம் திருச்செங்கோட்டில் உள்ள தொழில்முனைவோர் ஒருவர் கண்டுபிடித்து சாதனை படைத்துள்ளார். நாமக்கல் மாவட்டத்தில் நூற்றுக்கணக்கில் கோழிப் பண்ணைகள் உள்ளன. இந்தப் பண்ணைகளில் வளர்க்கப்பட்டு வரும் லட்சக்கணக்கான கோழிகள் மூலம் நாள் ஒன்றுக்கு 2 ஆயிரம் டன் எரு கிடைத்து வருகிறது. இந்தக் கழிவுகளை அப்புறப்படுத்துவதற்கு கோழிப்பண்ணை உரிமையாளர்கள் அதிக அளவு பணம் செலவழித்து வந்த நிலையில், கோழி எருவில் இருந்து மின்சாரம் தயாரிக்கும் புதிய தொழில்நுட்பத்தை திருச்செங்கோட்டைச் சேர்ந்த தொழில்முனைவோர் சிவப்பிரகாசம் என்பவர் கண்டுபிடித்து சாதனை படைத்துள்ளார். 320 டன் எருவில் இருந்து 20 மெகா வோல்ட் மின்சாரத்தை சிவப்பிரகாசம் உற்பத்தி செய்துள்ளது, கோழிப்பண்ணை உரிமையாளர்கள் உள்பட அனைத்து தரப்பு மக்களையும் வியப்பில் ஆழ்த்தியுள்ளது. மேலும், மின்சாரம் தயாரிக்கப் பயன்படும் கோழி எருவில் இருந்து டன் கணக்கில் இயற்கை உரத்தையும் சிவப்பிரகாசம் தயாரித்து சாதனை படைத்திருப்பது, விவசாயிகளையும் மகிழ்ச்சியடைய வைத்துள்ளது. சிவப்பிரகாசத்தின் புதிய கண்டுபிடிப்புகளால் சுற்றுச் சூழலுக்கு பாதிப்பு ஏற்படுத்தாத வகையில், கோழி எருவில் இருந்து மின்சாரமும், இயற்கை உரமும் தயாரிக்க முடியும் என்பது நிரூபிக்கப்பட்டுள்ளதாக நாமக்கல் மாவட்ட சமூக ஆர்வலர்கள் தெரிவித்துள்ளனர்.

« Back